न्यूयोर्क सिटी मेयरको प्रारम्भिक मतदान सुरु, पहिलो दिन झण्डै असी हजारद्धारा मतदान

न्यूयोर्क । न्यूयोर्क सिटीको मेयर निर्वाचनको प्रारम्भिक मतदान शनिबारदेखि सुरु भएको छ।  सिटीको पाँचवटै बोरोमा तोकिएको केन्द्रहरूमा भएको मतदानको पहिलो दिन नै हालसम्मकै किर्तिमानी मतदान भएको निर्वाचन कार्यालयले जनाएको छ । 
निर्वाचन बोर्डको तथ्याङ्क अनुसार, प्रारम्भिक मतदानको पहिलो दिन करिब ८० हजारले मतदान गरेका छन् । यसअघि सन् २०२१ मा भएको सिटी चुनावमा प्रारम्भिक मतदानको पहिलो दिन १५ हजार ४ सय १८ ले मतदान गरेकोमा यो वर्ष चार गुणा बढी रहेको छ।
निर्वाचन बोर्डका अनुसार शनिबार पहिलो दिन म्यानहटनमा मात्र २४ हजार ४६ मतदाताले मतदान गरेका छन् । यस्तै ब्रुकलिनमा २२ हजार १ सय ५, क्वीन्समा १९ हजार ४५ ब्रोंक्समा ७ हजार ७ सय ९३ र स्टेटन आइल्याण्डमा ६ हजार ४ सय २० मतदाताले मतदान गरेका छन् । यसरी पहिलो दिन कुल ७९ हजार ४ सय ९ मतदाता मतदानमा सहभागी भएका छन्। 
न्यूयोर्क सिटीको आम निर्वाचनमा मेयरसंगै सिटी कन्ट्रोलर, पब्लिक एडभोकेड, बोरो प्रेसिडेन्ट, डिस्ट्रिक्ट अटोर्नी र सिटी काउन्सिल मेम्बरहरुको निर्वाचन हुँदैछ । न्यूयोर्कसिटीको मेयरमा डेमोक्रेटिक पार्टीका जोहरन माम्दानी, रिपब्लिकन पार्टीका कर्टिस स्लिवा र स्वतन्त्र उम्मेद्धार पूर्व गभर्नर एन्ड्र्यु कुमो चुनाबी प्रतिस्पर्धामा छन् । डेमोक्रेटिक प्राइमरीमा माम्दानीले क्युमोमाथि ४४% विरुद्ध ३६% मत ल्याउँदै जीत हालिस गरेपछि कुमो स्वतन्त्र उम्मेद्धारको रुपमा चुनाबी मैदानमा उत्रेका हुन् । मत सर्वेक्षणहरुमा डेमाक्रेटिक उम्मेद्धार माम्दानी अन्य प्रतिस्पर्धी भन्दा अग्रता कायम गर्दै आएका छन् । 
पहिलो दिनको मतदानमा सहभागि हुने मतदाताहरुले शहरमा परिवर्तनको आवश्यकता रहेको बताएका छन्। कतिपय मतदाताले सबै प्रमुख दलहरूबाट निराशा व्यक्त गरे भने धेरैले डेमोक्र्याटिक सोसियालिस्ट मामदानीको अभियानलाई समर्थन गरेका छन्।