आइएमए कराते च्याम्पियनसिप प्रतियोगिता आयोजना, २५० वढी खेलाडि सहभागी

न्यू योर्क । न्युयोर्कको क्वीन्समा आइएमए कराते च्याम्पियनसिप प्रतियोगिता आयोजना भएको छ । क्वीन्सको पहिलो नेपाली कराते स्कुल आइएमए निहोन कराते डोको आयोजनामा भएको प्रतियोगिताको आइतबार गैरआवसीय नेपाली संघ अमेरिकाका महासचिव रामहरी अधिकारीले उद्घाटन गरेका छन् । 

प्रतियोगितामा विभिन्न सातवटा देशबाट २५० भन्दा बढी खेलाडिहरुको सहभागीता रहेको आयोजक एवं निहोन कराते डोका प्रमुख प्रशिक्षक शिहान शान्त थोकरले जानकारी दिए । प्रतियोगितामा अमेरिकाका विभिन्न राज्यहरुकासाथै क्यानाडा, भारत, अर्वेनिया, हंगेरी लगायतका देशका खेलाडिहरुको सहभागीता रहेको आयोजक थोकरले बताए । क्वीन्सको नरदनबुलेभर्डस्थित एल्मकोर सेन्टरको हलमा संचालन भएको प्रतियोगिता आइताबार विहान शुरु भएर दिनभरी संचालन हुनेछ । 

चारवटा खेलस्थलमा एकैपटक संचालन हुने प्रतिस्पर्धाका लागि नेपाली, नेपाली भाषी भुटानी र अन्य गरी ३५ जना रेफ्रीहरु सहभागी रहेको आयोजकले जनाएको छ । प्रतियोगितामा ५ वर्षका बालबालिकादेखि ४५ वर्षसम्मका खेलाडिहरु सहभागी छन् । प्रतियोगितामा सहभागी विभिन्न कराते स्कुलबाट खेलाडिहरुसंगै अविभावक र समर्थकहरुको ठूलो संख्यामा उपस्थिति रहेको छ । प्रतिस्पर्धी खेलाडिका समर्थकहरुले आ–आफ्ना खेलाडिको पक्षमा हुटिङ गर्दा खेलस्थलमा खेलको रौनकता छाएको छ ।   

६६ वटा प्रतिस्पर्धाका लागि काता र कुमुतेतर्फ गरी १३२ वटा स्वर्ण पदकका लागि खेलाडीहरुले प्रतिस्पर्धा गर्ने छन् । प्रतियोगितामा उमेर समूहमा ५ वर्ष मुनीदेखि ४५ वर्षभन्दा माथिको गरी १० वटा उमेर समूहले प्रतिस्पर्धा गर्नेछन् । प्रतियोगितामा १३२ स्वर्ण पदकसँगै १३२ रजत पदक र २६४ वटा काश्य पदक वितरण गरिने आयोजकले जनाएको छ । यसैगरी प्रतियोगितामा विभिन्न तीन विधामा ग्राण्ड च्याम्पियनसिप समेत प्रदान गरिने छ । ग्राण्ड च्याम्पियनसिपका तीन विजेताले १ हजार ४०० डलर नगद पुरस्कार हासिल गर्नेछन्। 

नेपाली कराते स्कुलले न्युयोर्कमा आयोजना गरेको यो पहिलो प्रतियोगिता हो । विगत १८ वर्षदेखि न्युयोर्कमा कराते स्कुल संचालन गर्दै आएका थोकरले हाल न्युयोर्कको क्वीन्सस्थित उडसाइड र फरेष्ट हिलमा इमा निहोन कराते डो संचालन गर्दै आएका छन् ।