लायन्स क्लब न्युयोर्कको परम्परागत घर दैलो देउसी भैलो कार्यक्रम सम्पन्न

न्यू योर्क । लायन्स क्लब न्युयोर्कले तिहार तथा शुभ दिपावलीको अवसरमा परम्परागत रुपमा घर घरमा गएर घर दैलो देउसी भैलो खेलेका छन्। न्युयोर्कमा नेपालीहरुले नेतृत्व गरेको २ वटा लायन्स क्लब क्विन्स केटिएम लायन्स क्लब र क्विन्स बुद्ध लायन्स क्लबको संयुक्त आयोजनामा न्युयोर्कको क्विन्स क्षेत्रमा परम्परागत शैलीमा घर दैलो देउसी भैलो कार्यक्रम गरेको हो। गएको शनिवार दिउसो २ बजे बाट शुरु भएको घर दैलो देयसी भैलो कार्यक्रम सॉझको ११ बजे सम्म चलेको थियो। देउसी भैलो कार्यक्रममा दुबै क्लबका अफिसरहरुले आ–आफ्नो जातिय भेषलाई परिचित गराउने पहिरनमा सहभागी भएका थिए । नेवार, मगर, तामांग, थकाली र नेपाली पहिरनमा सजिएर न्युयोर्कको क्विन्स स्थित नेपालीहरुको ब्यवसाय र घर–घरमा गई परम्परागत रुपमा मादल बजाएर देउसी भैलो भट्याउदै देउसी भैलो खेलेका थिए । ज्याक्सन हाईट्सस्थित नेपाली मम क्याफेबाट देउसी भैलो खेल्न शुरु गरेका क्लवका अफिसरहरुको समूहले गोर्खाली रेष्टुरेण्ट, नेपाली भान्छा घर, लेक साईड रेष्टुरेण्ट, डिजी प्लस, प्रणाम रेष्टुरेण्ट, रेडपाण्डा रेष्टुरेण्ट, बाजेको सेकुवा र काष्ठमण्डप रेष्टुरेण्टमा खेलेका देउसी भैलो मार्फत उनीहरुले ४ हजार डलर नगद दक्षिणा स्वरुप संकलन गरेका छन्।

संकलित रकम लायन्स क्लब मार्फत सामाजिक हितको लागि खर्च गरिने क्विन्स केटिएमकी अध्यक्ष तथा जोन चेयर रश्मी श्रेष्ठ र क्विन्स बुद्धका अध्यक्ष चन्द्र नेपालीले जानकारी दिए। न्युयोर्कमा नेपालीहरुले नेतृत्व गरेको २ वटा लायन्स क्लब क्विन्स केटिएम लायन्स क्लब र क्विन्स बुद्ध लायन्स क्लब गएको ५ बर्ष देखि परम्परागत शैलीमा घर र व्यवसायको दैलोमा पुगी देउसी भैलो खेल्दै आएका छन्। 

प्रवासी भुमीमा नेपाली कला, संस्कृति, भेषभुषाको जगेर्ना र यस्को संरक्षणको लागि लायन्स क्लबले न्युयोर्कको क्विन्समा घर दैलो देउसी भैलो खेल्दै आएका छन् ।