वरिष्ठ गायिका इन्दिरा गोलेको उपचारको लागि तामाङ सोसाइटी अफ अमेरिकाद्धारा सहयोग प्रदान

 
काठमाडौं । वरिष्ठ सेलो गायिका इन्दिरा गोलेको क्यान्सर उपचारका लागि तामाङ सोसाइटी अफ अमेरिकाले करिब ५ हजार डलर सहयोग गरेको छ । ललितपुर हरिसिद्दिस्थित नेपाल क्यान्सर अस्पतालमा उपचाररत लोकप्रिय गायिका इन्दिरा गोलेको उपचारका लागि न्युयोर्कमा बसोबास गर्ने तामाङ समुदायबाट संकलित ४ हजार ९९९ डलर सोसाइटीका अध्यक्ष बुद्धिमान तामाङले ललितपुर हरिसिद्दिस्थित अस्पतालमा नै पुगेर हस्तान्तरण गरेको हो । अस्पतालमा पुगेर उनले वरिष्ठ गायिका गोलेको शिघ्र स्वास्थ्य लाभको कामना गरेका थिए । 

तामाङ समुदायमाझ अत्यन्त लोकप्रिय गायिका गोले विगत दुई वर्षदेखि क्यान्सर रोगसंग लडिरहेका छन् । उपचारका क्रममा आर्थिक अभाव भएको भन्दै नेपाल तामाङ कलाकार संघले सहयोगको अपिल गरे अनुरुप तामाङ सोसाइर्टी अफ अमेरिकाले सहयोग गरेको सोसाइटीले जनाएको छ । सोसाइटीका अध्यक्ष तामाङले सबै सहयोगीहरुमा धन्यवाद दिदै आगमी दिनमा पनि वरिष्ठ गायिका गोलेको उपचारमा सहयोग गरिने बताएका छन् ।  

उनको उपचारमा आर्थिक अभाव भएको भन्दै नेपाल तामाङ कलाकार संघको संयोजनमा विभिन्न तामाङ कला र संगीत सम्बद्ध संघसंस्थाहरुले “इन्दिरा गोले बचाउ अभियान” सन्चालन गरेका छन् । अभियानले एक विज्ञप्ति जारी गर्दै बिस्वभरी छरिएर रहेका सेलो संगीतप्रेमी मनहरुलाई आफुले सकेको आर्थिक सहयोग गर्न समेत अनुरोध गरेको छ ।