नेपाल–तिब्बत बाढीपीडितका लागि ज्याक्सन हाइट्समा आजदेखि दुईदिने राहत संकलन मेला

न्यु योर्क। नेपाल–तिब्बत सीमा क्षेत्रमा आएको विनाशकारी बाढीबाट प्रभावित समुदायको सहयोगका लागि न्यु योर्कका नेपाली व्यवसायी तथा समुदायका सदस्यहरूले ज्याक्सन हाइट्समा दुईदिने सामुदायिक राहत संकलन मेला आयोजना गर्ने भएका छन्।

मेला शनिबार, सेप्टेम्बर ५ र आइतबार, सेप्टेम्बर ६ मा बिहान ११ बजेदेखि साँझ ७ बजेसम्म ७७–०४ रुजवेल्ट एभेन्यूस्थित गोर्खाली नेपाली रेस्टुरेन्टमा आयोजना हुनेछ।

आयोजकहरूका अनुसार मेलाबाट उठेको सम्पूर्ण रकम नेपाल सरकारको "प्राइम मिनिस्टर डिजास्टर रिलिफ फन्ड"मा पठाइनेछ। बाढीबाट प्रभावित परिवारलाई सहयोग गर्न न्यु योर्कको नेपाली समुदायलाई एकै ठाउँमा ल्याउने र राहत कार्यमा प्रत्यक्ष योगदान गर्ने उद्देश्यले कार्यक्रम आयोजना गरिएको जनाइएको छ।

अगस्ट २६ मा नेपाल–चीन सीमा क्षेत्रमा हिमनदी तथा पहिरोसम्बन्धी घटनापछि आएको भीषण बाढीले रसुवा, नुवाकोटलगायत क्षेत्रमा ठूलो जनधनको क्षति गरेको थियो। घर, सडक, पुल तथा जलविद्युत् आयोजना बगाउनुका साथै कैयौँ गाउँ प्रभावित भएका छन्।

सेप्टेम्बर ५ मा रोयटर्सले प्रकाशित गरेको पछिल्लो विवरणअनुसार नेपालमा बाढीबाट मृत्यु हुनेको संख्या १,३४४ पुगेको छ भने करिब ४,८८७ जना अझै बेपत्ता छन्। तिब्बतमा पनि कम्तीमा ३१ जनाको मृत्यु र सयौँ मानिस बेपत्ता रहेको रिपोर्ट गरिएको छ। खोज तथा उद्धार कार्य अझै जारी छ।

आयोजकहरूले न्यु योर्क, विशेषगरी क्वीन्समा बसोबास गर्ने धेरै नेपाली परिवारको बाढी प्रभावित क्षेत्रका मानिससँग प्रत्यक्ष पारिवारिक तथा सामुदायिक सम्बन्ध रहेकाले विपद्को प्रभाव स्थानीय नेपाली समुदायले समेत गहिरो रूपमा महसुस गरिरहेको बताएका छन्।

यस कठिन समयमा समुदायलाई एकजुट गर्दै पीडितका लागि ठोस सहयोग जुटाउनु मेलाको मुख्य उद्देश्य रहेको आयोजकहरूको भनाइ छ।