हेल्थकेयर सिइओ हत्याको आरोपीलाई फस्र्ट डिग्री अभियोग, हत्याको घटनामा कुनै नायकत्व छैनः पुलिस कमिस्नर

न्यूयोर्क । न्यूयोर्कको व्यस्त शहर म्यानहाटनमा भएको हेल्थकेयर सिइओ हत्या घट्नाका आरोपी लुइजी मंगियोनलाई फस्र्ट डिग्री हत्याको अभियोग लगाइने भएको छ । न्यूयोर्कको ग्राण्ड जुरीले योजनाबद्धा हत्याको आरोपमा फस्र्ट डिग्री अभियोग र आतंककारी गतिविधिको आरोपमा सेकेण्ड डिग्री अभियोग लगाउने तयारी भएको म्यानहटनका डिस्ट्रिक्ट अटर्नी एल्भिन ब्रागले मंगलबार जानकारी दिएका हुन् । यसअघि म्यानहटन अदालतमा उनलाई सेकेण्ड डिग्री मर्डरको अभियोग लगाउने तयारी गरेको थियो । फस्र्ट डिग्री हत्या अभियोग पुष्टि भए लुइजीलाई आजीवन काराबासको सजाय हुनेछ । 

अभियुक्त लुइजीलाई आगमी विहीबार न्यूयोर्क ल्याउने तयारी भइरहेको श्रोतले जनाएको छ । न्यूयोर्क सुपुर्दगीका लागि विहीबार नै उनलाई पेन्सिलभेनिया अदालतमा पेश गरिने छ । पेन्सिलभेनिया अदालतमा हुने फैसलाले लुइजीलाई म्यानहटनमा सुपुर्दगी गर्ने फैसला गरिने अपेक्षा छ । डिसेम्बर ४ मा न्यूयोर्कको म्यानहटनमा युनाइटेड हेल्थकेयरका सीईओ ब्रायन थम्पसनको हत्याको आरोपमा लुइजी मंगियोनलाई एकसाता पछि पेन्सिलभेनियामा पक्राउ गरेको थियो । 

मिडटाउन हत्या घटनाको बारेमा मंगलबार आयोजना भएको पत्रकार सम्मेलनमा डिस्ट्रिक्ट अटर्नी ब्रागले प्रहरी अनुसन्धानबाट हेल्थकेयर सिइओ थम्पसनको हत्यालाई “पूर्वनियोजित, लक्षित बन्दूक हिंसा”को रूपमा वर्णन गर्दै यो स्वीकार्य र कहिल्यै सहन नमिल्ने किसिमको भएको बताए । “यो एक कायरतापूर्ण, योजनाबद्ध लक्षित हत्या थियो जुन आतंक र ध्यान आकर्षित गर्नको लागि गरिएको थियो ।” आतंका फैलाउने उद्देश्यले हत्याका घटना घटाएकोले आतंकवादी कार्यको आभियोग समेत रहेको ब्रागले थपे ।

मंगियोनबाट प्रहरीले जफत गरेका लेखाइहरूले उनी युनाइटेड हेल्थकेयरमा महिनौंसम्म ध्यान दिनुमा व्यस्त रहेको र सीईओलाई मार्ने योजना समेत तयार गरेको पुष्टि भएको प्रहरीको दावी छ । लुइजी मंगियोन न्यूयोर्कमा थम्पसनलाई मार्ने उद्देश्यले नोभेम्बरको अन्त्यमा आएर म्यानहटनको अपर वेस्ट साइडको होस्टलमा बसेको अनुसन्धानबाट खुलेको थियो । त्यहाँ उनले न्यूजर्सीको नक्कली परिचयपत्र प्रस्तुत गरेका थिए जुन परिचयपत्र उनलाई डिसेम्बर ९ मा गिरफ्तारीका क्रममा फेला परेको थियो । ४ डिसेम्बरको बिहान एक घण्टाभन्दा बढी समय मंगियोनले हिल्टन होटलको बाहिर थम्पसनको आगमनको पर्खाइमा बिताएको र युनाइटेड हेल्थकेयरका सीईओ थमसन बाहिर निस्के लगतै आफुसंग भएको घोस्टगन (घरेलु बन्दुक) निकालेर गोली चलाएको प्रहरीको आरोप छ । हत्यापछि, मंगियोनले मिडटाउनको पश्चिम ५४ औं स्ट्रीटबाट भागेर नजिकको सेन्ट्रलपार्कमा पुगेर इ–बाइक चढेको दावी प्रहरीको छ । 

हत्याको घटनामा कुनै नायकत्व छैनः पुलिस कमिस्नर

युनाइटेड हेल्थकेयरका सिइओको हत्याको विषयलाई लिएर कतिपय सामाजिक संजाल प्रयोगकर्ताहरुले हत्याको पक्षमा वकालत गरेको भन्दै न्यूयोर्कसिटी प्रहरीका कमिस्नारले आक्रोस ब्यक्त गरेका छन् । मंगलबार भएको पत्रकार सम्मेलनमा कमिस्नार जेसिका टिशले यो हत्या कुनै बहादुरी नभएको भन्दै आक्रोश व्यक्त गरेका हुन् । 
पुलिस आयुक्त जेसिका टिशले ग्राण्डजुरीको अभियोगले थम्पसनको परिवारका लागि न्याय प्राप्त गर्न र कानूनी शासनको पालना गर्न एक कदम नजिक पुर्याएको बताए । उनले शहरका कतिपय मानिस र सोसल मिडिया प्रयोग गर्ने व्यक्तिहरूको आलोचना गर्दै हत्या गरेको घटनालाई सेलिब्रेन नगर्न चेतावनी दिए । हत्या गरेका मंगियोनलाई एक नायकको रूपमा प्रस्तुत गरेको भन्दै उनले असन्तुष्ट प्रकट गरे । 
“ब्रायन थम्पसनको हत्या भएको लगभग दुई हप्तापछि, हामीले क्रूर हत्याको शोकजनक र भयावह उत्सव देखेका छौं । सोसल मिडियामा यो घटनाप्रति प्रशंसा प्रकट गरिएको छ,” टिशले भनिन्। ” हत्याको घटनामा कुनै नायकत्व छैन । यो एक निरर्थक हिंसात्मक कार्य हो, उनले भनिन । 

यता सामाजिक संजान प्रयोगकर्ताहरुले भने अनलाइनमार्फत आरोपित लुइजी मंगियोनलाई सम्मान गरेका छन् र केहि मानिसहरूले त उनको बचाउ कोषमा दान समेत गरेका छन् ।