सर्वत्र विरोधकावीच म्यानहटन प्रवेश गर्ने सवारीको लागि पुनः शुल्क घोषणा

न्यूयोर्क । सर्वत्र विरोधकावीच न्यूयोर्क राज्यकी गभर्नर क्याथी होकलले म्यानहटन प्रवेश गर्ने सवारी साधानको लागि सवारी भीड नियन्त्रण शुल्क ‘कन्जेस्सन प्राइस’ पुनः घोषणा गरेकी छिन् । म्यानहटनबासी तथा अन्य सर्वसाधारणबाट समेत व्यापक विरोध भएपछि गत जुनबाट लागु हुने भनिएको यो शुल्क योजना राष्ट्रपति निर्वाचनमा जनता रिसाउने डरले गभर्नर होकलले स्थगित गरेकी थिइन् । तर निर्वाचन सकिए लगतै गभर्नर होकलले विहीबार पुनः घोषणा गरेकी हुन् । 

म्यानहटनमा भएको घोषणा कार्यक्रममा गभर्नर होकलले आगमी डिसेम्बरको अन्त्यबाट लागु हुने गरी शुल्क घोषणा गर्दै १५ डलरको सट्टा अब ९ डलर कायम गरिएको जानकारी दिए । उनले म्यानहटन शहरको सिक्सटी स्ट्रिट भन्दा तल प्रवेश गर्ने सवारी साधानले यो शुल्क तिर्नुपर्ने बताए । 

‘यो शुल्कबाट वार्षिक १५ विलियन डलर संकलन हुने र यसबाट न्यूयोर्कसिटीको सबवे ट्रेन र सिटी बसको गुणस्तर वृद्धिको लागि प्रयोग गरिने छ,’ घोषणा कार्यक्रममा गभर्नर होकलले भने । यसअघि १५ डलर भनिएपनि न्यूयोर्कका घरपरिवारलाई आर्थिक भार घटाउने उदेश्यले ९ डलर निर्धारण गरिएको उनको दावी थियो । यो घोषणापछि म्यानहटन शहरको मुख्य क्षेत्रमा सवारी चाप कम हुने र यसबाट पैदल यात्री तथा आकास्मिक सवारी संचालनको लागि सहज हुने उनको भनाई थियो । एमटीए ट्रेनको गुणस्तर वृद्धिको लागि २०२५–२९ कार्य योजना घोषण गरिएको र सो योजना कार्यान्वयनको लागि यो शुल्क उठाउनु परेको उनले बताए । 

यो शुल्क घोषणाप्रति राष्ट्रपति निर्वाचित डोनाल्ड ट्रम्पले भने यसअघि नै कडा विरोध जनाएका थिए । त्यतिखेर उनले आफु राष्ट्रपति निर्वाचित भएमा यो घोषणा खारेज गर्ने समेत बताएका थिए । ट्रम्पको कार्यकाल शुरु भएपछि यो घोषणा कार्यान्वयन गर्न अफ्ठ्यारो हुने भएपछि न्यूयोर्ककी गभर्नर होकलले हतार हतार लागु गर्न खोजेको टिप्पणि भइरहेको छ । राज्यको गभर्नरले घोषणा गरिसकेको योजना रद्द गर्न भने संघीय सरकारलाई अफ्ठेरो हुने गर्दछ ।