मिल्टन आँधीले ५० बिलियनको क्षति, प्रभावित क्षेत्रमा उद्धारकार्य जारी

न्यूयोर्क । विनाशकारी आँधी मिल्टनले फ्लोरिडामा ५० बिलियन डलर बराबरको क्षति पुर्याएको प्रारम्भिक अनुमान गरेको छ । फ्लोरिडाको दक्षिणी शहरहरु पूर्वदेखि पश्चिमतटीय क्षेत्रसम्मा आएको आँधीले १४ जनाको ज्यान लिनुकासाथै ५० बिलियन डलर बराबरको क्षति पुर्याएको हो । 

शनिबार राष्ट्रपति जो बाइडेलले हुरिकेनबाट ५० बिलियन डलर बराबरको क्षति पुर्याएको जानकारी दिदै आफ्नो सरकारले प्रभावित क्षेत्रमा पुरानै अवस्थामा फर्काउन सक्दो प्रयास गरिरहेको बताएको विभिन्न संचारमाध्यमहरुले जनाएका छन् । “पहिला हामी जहाँ थियो त्यही पुग्नलाई सक्दो प्रयास भइरहेको छ,” जो बाइडेनको भनाई उल्लेख गर्दै न्युयोर्क टाइम्सले लेखेको छ, मेरो सरकारको पहिलो प्राथमिकता विद्युतबाट बन्चितहरुलाई विद्युत पुनस्.ःस्थापना गर्ने र बस्तीहरुको भग्नावेश हटाउने हुनेछ ।”

आँधीबेहरीपछि आएको चक्रबात र हावाहुरीमा परि चौध जनाको ज्यान गएको छ । ती मानिसहरुको मृत्यु आँधीका कारण नभई आँधीपछि रुखले किचेर र चक्रवातमा परेर मृत्यु भएको स्थानीय अधिकारीहरुले जनाएका छन् । 

आँधीका कारण घर छाडेर हिडेकाहरु विस्तारै घर फर्किन थालेका छन् तर, प्रभावित क्षेत्रमा विजुली तथा सवारीसाधानको इन्धनको हाहाकार हुँदा धेरैलाई पिरोलेको छ । बाढीमा परेकाहरुको उद्धारकार्य पनि जारी रहेको फ्लोरिडाका गभर्नर रोन डेसान्टिसले बताएका छन् । उनले प्रभावित क्षेत्रका नागरिकलाई अझैपनि सचेत अपनाउन आग्रह गरेका छन् । मौसमविदहरुले सो क्षेत्रमा अझैपनि बाढी आउन सक्ने चेतावनी दिएका छन् । पश्चिम तटीय क्षेत्रको शहर ओर्लाण्डोको विमानस्थल संचालनमा आएपनि पूर्वीतटीय क्षेत्रको शहर सारासोटाको अन्तरराष्ट्रिय विमानस्थल अक्टोबर १६ बाट मात्र संचालनमा आउने जनाइएको छ ।