ट्रम्पले ग्रीन कार्ड लटरी कार्यक्रम स्थगित गरे

वाशिङ्टन। राष्ट्रपति डोनाल्ड ट्रम्पको निर्देशनपछि डिपार्टमेन्ट अफ होमल्यान्ड सेक्युरिटीले डीभी एक कार्यक्रम तुरुन्तै रोक्न युएस सिटिजनशिप एन्ड इमिग्रेसन सर्भिसेसलाई निर्देशन दिएको छ । यो कार्यक्रम डाइभर्सिटी इमिग्रेन्ट भिसा प्रोग्रामअन्तर्गत पर्ने ग्रीन कार्ड लटरी प्रक्रियाको एक हिस्सा मानिन्छ ।

डिपार्टमेन्ट अफ होमल्यान्ड सेक्युरिटीकी सेक्रेटरी क्रिस्टी नोएमले दिएको निर्देशनपछि प्रक्रिया रोकिएको समाचारमा जनाइएको छ । रोयटर्सका अनुसार, स्थगनको कारणबारे प्रारम्भिक घोषणामा विस्तृत विवरण दिइएको छैन ।

तर पछिल्ला रिपोर्टहरूका अनुसार, यो कदम ब्राउन युनिभर्सिटी र एमआइटिसँग जोडिएका हालसालैका गोलीकाण्डपछिको सुरक्षा बहसमै केन्द्रित छ । क्लाउडियो नेभेस भालेन्ते नामका पोर्चुगलका नागरिक उक्त घटनाका संदिग्ध भएको र उनले सन् २०१७ मा ग्रीन कार्ड लटरी प्रक्रियामार्फत स्थायी बसोबास प्राप्त गरेको विवरण सार्वजनिक भएपछि ट्रम्प प्रशासनले कार्यक्रम रोक्ने निर्णय गरेको बताइएको छ । 

डाइभर्सिटी इमिग्रेन्ट भिसा प्रोग्राम कंग्रेसले बनाएको कानुनी कार्यक्रम हो, जसले अमेरिकामा कम आप्रवासन हुने देशहरूका नागरिकलाई वार्षिक रूपमा ५० हजारसम्म आप्रवासी भिसा उपलब्ध गराउने व्यवस्था गर्दछ । युएस सिटिजनशिप एन्ड इमिग्रेसन सर्भिसेसको आधिकारिक जानकारीमा पनि वार्षिक सीमाबारे उल्लेख छ ।

डीभी रोकिएपछि प्रक्रियामा रहेका फाइलहरू, आगामी चरण, वा सम्बन्धित मितिहरूमा कस्तो असर पर्छ भन्नेबारे थप प्रस्ट निर्देशिका सार्वजनिक हुन बाँकी छ । यसैबीच, स्टेट डिपार्टमेन्टले पहिले नै डीभी २०२७ को दर्ता अवधि सम्बन्धी परिवर्तन लागू गर्दै “दर्ता सुरु मिति यथाशीघ्र घोषणा गरिने” जनाएको थियो ।